URTIJËI: La scultura cuntemporana de Gherdëina descëida for n majer nteres a livel internaziunel

0

Ai 30 de nuvëmber ie unì prejentà tl’Aula Magna dl zënter scolastich de Urtijëi l catalogh dla mostra de scultura “Legno – Lën – Holz”, tenida a Trënt tla Galleria Civica, per cont dl Mart – Museum de ert moderna de Rurëi.

Danter i 15 artisc’ che ova pudù mëter ora si lëures de lën, fova bën 11 de Gherdëina. N aspet nteressant de chësta mostra, dedicheda ala scultura figurativa a grandëza naturela, fova che dui chindesc à mparà l ert dl ziplé te nosta Scola d’Ert.

Ntan la descuscion, a chëla che à tëut per i artic’ Aron Demetz, Peter Demetz y Matthias Kostner, iel unì rujenà dla deficulteies al scumenciamënt, ma nce dla gran sudesfazions che vën dal recunescimënt internaziunel. L ie nce unì rujenà dla mpurtanza de se nuzé dla sinergies che ie te Gherdëina y de se sustenì un cun l auter. L suzes di singuli porta pro a fé cunëscer la realtà de Gherdëina ora per dut l mond.

Chësc recunescimënt internaziunel tl ciamp dl’ert cuntemporana ie zeche de nuef per la scultura de Gherdëina, cun si ravises de catercënt ani che à sapù da se giaurì ala sensibilità d’aldidancuei.

Per i jëuni y i studënc dl Lizeum d’ert Cademia y dla Scola Prufesciunela che fova presënc, possa chësc flurì dl ziplè de Gherdëina dé gran ardimënt a studië, a vester davierc y a crì stredes che se giaurirà per ëi.

Metù a jì la manifestazion à l Chemun de Urtijëi deberieda cun l Museum Ladin Ćiastel de Tor, la Galleria Civica de Trënt y l Lizeum d’ert “Cademia”.

About Author

Comments are closed.

Zur Werkzeugleiste springen