Urtijëi. De cie se cruzia pa perdrët l Chemun? N riassunt dl ann 2018.

0

Pra l’ultima senteda de Cunsëi à i Assessëures y i Cunselieres deleghei fat n pitl resocont per cie che reverda chël che ie unì fat ntan l ann 2018 per Urtijëi.

Drucan sun l cunliamënt dessot pudëis ti dé n udleda ala relazions di Assessëures per l ann 2018:

https://www.gemeinde.stulrich.bz.it/it/Relazione_della_Giunta_comunale_sull_attivita_amministrativa_nell_anno_2018

Drucan sun l cunliamënt tlo dessot pudëis scuté su ai file audio dl’ultima senteda de Cunsëi de Chemun

https://www.comune.ortisei.bz.it/it/Riunione_del_consiglio_comunale_del_07_05_2019_in_tedesco_e_file_audio

Ma cie ie uel pa perdrët dì “Chemun”?

Chemun ie plu che mé fé delibres o dé na lizënza per pudëi frabiché. Chemun scumëncia da canche nascion y union registrei, va inant cun la scolina, che muessa cialé che la nes vede bën, l Chemun muessa cialé de abiné n nonno vigile, che cëla che canche jon a scola ne ruvon nia sota n auto ite. Chemun ie la lia dal sport che giapa i cuntribuc, ti pudan nscila jì ncontra ala families. Chemun ie la lies che juda a sozialisé y a tré l fla ora de ëura, la lies che abelësc tres si scumenciadives l luech. Ma Chemun ie nce la noza zevila, l prim cuatier tres l frabiché alesirà, la stredes asfaltedes, l’eges blances y chëles fosces, anzi: l got de ega che buon daduman, zënza pensé sëura doi iedesc cie fertuna che on à avëi de tel bona ega.

Chemun ie l servisc dl refudam, la senialetiches sun streda, la plaza dala dlacia via n Setil, che vën fata cun lezitënza dai lauranc de Chemun, l derturé sieves, l sblancé la garage publica y l ti sté do ala plazes da fé da mat. Chemun ie lënia per i zitadins, la cunlaurazion cun i servijes per i jëuni, l cunsië co la mëter a jì cun prozedures burocratiches bëndebò ntortes, comuniché cun i zitadins tres Plata de Gherdëina, ancuntedes publiches, discuscions ciaudes y fé al savëi tres l internet.

Chemun ie sustenì nosc artejans. Chemun ie l pudëi avëi l servisc mensa, la KITA, l Matada y l se cruzië di chegadoies pra l marcià de Segra Sacun. Chemun ie nce ti dé na sburdla a chëi che fej cultura, che fej mostres y sambën a chëi che fej ulentariat. Chemun ie sustenì i destudafuech y i paures. Chemun ie cialé che i ruves ne vede nia sëurora, canche l jeta, y seguré sfundrons, acioche purons ne tome nia ju sun la cëses. Chemun ie ti dé datrai na sënta ala lies, cumpré mubilia per la nfrastrutures publiches, ti judé ai artejans che uel mëter su na berstot, uneré i sportives, mantenì nosta rujeneda, mudé urdinamënc y cialé che l luech cële ora dut ntëur nët.

Ma Chemun ie nce cialé che l nëine giape n post tla cësa de paussa y Chemun ie, ala fin de nosc dis, nce l cumité de curtina y l polizai che śera ju la streda ntan la supeltura.
Chemun ie perchël nce solidarietà, purvé a svilupé na cuscienza zivica y na cultura de discuscion. Chemun ie cialé sun nosc ambient y avëi vijions.

Chemun ie, dit te paroles scëmples, cialé cun trasparënza che l nteres publich vënie dan l nteres privat.

Chemun ie ala fin n spiedl dla vita y davia che la ie ti vita…
… ies dantaldut nce tu Chemun.

De gra a duc dl sustëni, dla cunlaurazion y dla pazienza.

About Author

Comments are closed.

Zur Werkzeugleiste springen